На сваім месцы
У дзяцінстве Алена Зубок часта дапамагала бацькам на ферме: разам з імі даглядала цялят. Ужо тады было бачна, як стараецца дзяўчынка, і яе шчырыя адносіны да жывёлы. Гэта, напэўна, і прадвызначыла жыццёвы шлях Алены Анатольеўны, якая практычна адразу пасля заканчэння школы пайшла працаваць аператарам машыннага даення.
Гэта была сапраўды любімая справа, і мяняць работу Алена Зубок не збіралася. Але ў жніўні гэтага года Алена Анатольеўна стала працаваць аператарам па вырошчванні цялят на МТК “Бор” ААТ “Аграсімвал”.
— Гэту работу мне прапанавала начальнік МТК “Бор” Сафія Рымша. Я не вельмі ахвотна, але ж згадзілася, — прызнаецца жанчына. — Была ўпэўнена, што гэтая праца будзе для мяне часовай. Але вось ужо пяты месяц, як я штодзень з задавальненнем прыходжу ў цялятнік.
— Я нездарма прапанавала месца Алене Анатольеўне. Бачна, як яна адказна ставіцца да працы ў цэлым і да жывёл. Я адчуваю людзей, і на гэты раз таксама не памылілася з кандыдатурай, — дадае Сафія Рымша. — Алена працуе з душой. Яна не ўмее быць абыякавай.
Алена Зубок даглядае самых маленькіх цялят, якім яшчэ няма 20 дзён. З такімі, безумоўна, складаней працаваць, чым з дарослымі жывёламі.
— Яны ж зусім як дзеці, — са шчырай усмешкай гаворыць субяседніца. — Ім трэба цёпленькага малачка даць, папаіць кожнага з бутэлькі. Перажываю, калі хтосьці хварэе. У такіх выпадках адразу клічу ветэрынара.
Раней цялят даглядалі даяркі, але ім было няпроста сумяшчаць гэты абавязак з асноўным. Гэта адбівалася і на агульных вытворчых паказчыках. Зараз сітуацыя значна палепшылася: за чатыры месяцы сярэднясутачная прывага ў вазе жывёл, якіх даглядае Алена Зубок, склала 784 грама. Сярэднясутачная прывага ў вазе на МТК “Бор” — 462 грама.У дзень нашай сустрэчы Алена Анатольеўна даглядала 56 цялят. Гэта лічба часта мяняецца, таму што на ферме амаль кожны дзень адбываюцца расцёлы кароў.
— Гэта толькі на першы погляд яны ўсе маленькія і падобныя. Насамрэч яны ўсе розныя. Больш за тое, кожны са сваім характарам, — гаворыць Алена Зубок. — Я ўжо цалкам прызвычаілася да працы.
Жыве Алена Зубок у аграгарадку Бор, недалёка ад фермы. Да сваіх цялят жанчына прыходзіць тройчы на дзень. Выхадныя і святочныя дні — не выключэнне.Да такога графіку прывыкла. Зараз праца займае большую частку яе часу. Дзеці ўжо дарослыя (іх у жанчыны чацвёра), жывуць асобна. З хатнімі справамі часта дапамагае муж. Ён надзейны памочнік і ў цялятніку. Анатоль Зубок, дарэчы, працуе на ферме жывёлаводам.
Падчас размовы Алена Зубок прызналася, што не ўяўляе сябе ў іншай сферы:
— Я не змагу ўжо без гэтай працы. Не тое, каб не хачу пераменаў, не. Я знайшла сябе тут, зараз я дакладна на сваім месцы.
