Молодёжь Школьнікі ўдзельнічаюць ў працоўным атрадзе. 04.07.2017 116 Redactor Комментариев нет Правесці лета з карысцю вырашылі ўдзельнікі працоўнага атрада, які зараз шчыруе на палетках ААТ “Племянны завод “Індустрыя”. На працу школьнікаў накіраваў раённы камітэт Беларускага рэспубліканскага саюза моладзі. Працуюць яны штодзень па чатыры гадзіны. Задача хлопцаў і дзяўчат — правесці відавую праполку збожжавых культур. — Такая праполка праводзіцца для таго, каб захаваць чыстую гатунковасць насення і не засмечваць насенныя пасевы, — тлумачыць галоўны аграном гаспадаркі Сяргей Алесік. — Відаць, што дзеці стараюцца, праводзяць праполку якасна. Працуюць яны абавязкова пад наглядам дарослых. Гаспадарка арганізавала транспарт, які штодзень забірае атрад з Мар’-інай Горкі і дастаўляе на поле. — Я задаволена, што трапіла ў гэты атрад, — расказвае вучаніца школы №4 горада Мар’іна Горка Ірына Сарачынская. — Праца не складаная. Пальчаткі і нажніцы нам выдалі, галаўныя ўборы бяром з сабой. У нас атрымалася добрая і вясёлая каманда. Праца ў такім атрадзе — добрая магчымасць зарабіць грошы. Бацькі таксама задаволены, што мы праводзім лета з карысцю. На гэтым тыдні галоўны спецыяліст аддзела працоўных адносін упраўлення па працы, занятасці і сацыяльнай абароне райвыканкама Анастасія Салавей і галоўны спецыяліст аддзела па тэхнічным забеспячэнні сельскагаспадарчай вытворчасці ўпраўлення сельскай гаспадаркі і харчавання Святлана Карзанава пабывалі на полі, паглядзелі, як працуюць школьнікі. Яны праверылі неабходную дакументацыю і арганізацыю працы. Парушэнняў спецыялісты не знайшлі. Працаваць атрад будзе да 5 ліпеня. Пасля школьнікі атрымаюць заробак, а разам з ім і працоўныя кніжкі з першым запісам пра месца працы. Кацярына ВЕРНІКОЎСКАЯ.