Коротко о разном Сельгасарганізацыі прыступілі да сяўбы кукурузы 04.05.2016 101 Redactor Комментариев нет Для земляробаў раёна працягваецца адказны перыяд вясенніх палявых работ. Завяршыўшы сяўбу ранніх яравых збожжавых культур, сельгасарганізацыі прыступілі да сяўбы кукурузы. У сельгасфіліяле «Светлая ніва» ААТ «Мінскі маторны завод» сеяць «царыцу палёў» пачалі тыдзень таму. Механізатары імкнуцца ўкласціся ў вызначаныя тэрміны: цалкам пасеяць гэтую культуру яны плануюць да сярэдзіны мая. — Спадзяёмся, што надвор’е не ўнясе карэктывы ў нашы планы, — гаворыць галоўны аграном Дзяніс Рабуха. — Пад кукурузу мы адвялі 400 гектараў плошчы. Гэта культура вядома сваімі пажыўнымі рэчывамі, пераацаніць яе ролю ў кормавытворчасці цяжка. Таму на 300 гектарах мы будзем вырошчваць кукурузу на сілас, на астатніх 100 гектарах — на зерне. Перад пасяўной кампаніяй закупілі амаль 3,5 тоны насення кукурузы. У хуткім часе набудзем яшчэ некалькі тон. Пасеяць кукурузу ў тэрмін — такая задача стаіць перад механізатарам Мікалаем Рагожнікам. Мікалай Васільевіч працуе ў сельгасфіліяле амаль 25 гадоў. Апошнія 10 гадоў ён сее і ўбірае кукурузу. — Работы наперадзе яшчэ нямала. Галоўнае, каб тэхніка і надвор’е не падводзілі, — адзначае механізатар. — Робім усё, каб кукуруза дала добрыя ўсходы і ўрадзіла. Падрыхтоўкай глебы перад пасевам кукурузы займаўся механізатар Аляксандр Савіч. Цяпер ён заняты на культывацыі глебы на полі, дзе хутка будуць падсяваць шматгадовыя травы. Вадзіцель Аляксандр Ананіч — таксама ў зладжанай камандзе, якая задзейнічана на сяўбе «царыцы палёў». Ён падвозіць зерне Мікалаю Рагожніку, выконвае за дзень некалькі рэйсаў па маршруце зернесклад-поле. — Пакласці насенне ў глебу — гэта толькі першы этап на шляху атрымання добрага ўраджаю. Пасля будзем праводзіць хімпраполку, яшчэ крыху пазней — падкормку культуры, — працягвае галоўны аграном Дзяніс Ігаравіч. — Спа-дзяёмся, кукуруза ў гэтым годзе нас парадуе. Заканамерны факт: калі яна ўродзіць, значыць, мы забяспечым кармамі жывёлу, а будзе малако — будуць у гаспадарцы грошы. Кацярына ВЕРНІКОЎСКАЯ