— Нягледзячы на тое, што мінулы год для ўсёй эканомікі краіны аказаўся складаным з-за сітуацыі з пандэміяй каранавіруса, будаўніцтва аб’ектаў не спынялася.  І планы па ўводзе жылля  раён  выканаў.

У пасёлку Дружны мы здалі 80-кватэрны жылы дом, дзе 22 кватэры будаваліся з дзяржаўнай падтрымкай, а астатнія — з далявым удзелам грамадзян. Здалі таксама дом у  Мар’інай Горцы  (мікрараён Новая Зара) на 40 кватэр і дом на вуліцы Малінавая, у якім  будаваліся шматдзетныя сем’і.  Але 5 кватэр у новабудоўлі былі вылучаны пад арэнднае жыллё.  У тым ліку, для медыцынскіх работнікаў, пытанне замацавання якіх  у  раёне  мае  першачарговае значэнне.

Выконвалі   будаўніцтва   Пухавіцкая  МПМК-14  і   ААТ  «Будаўнічы  трэст  №35»  (Мінск).

Вялося ў мінулым годзе ў раёне і індывідуальнае будаўніцтва.  Па традыцыі актыўней за ўсё  будаваліся гараджане і   жыхары  прысталічных  населеных  пунктаў.

У бягучым годзе  новабудоўлі ў нашым раёне таксама будуць.  Плануем здаць у эксплуатацыю тры жылыя дамы.  39 шматдзетных сем’яў заселяцца ў 40-кватэрны дом у вёсцы Блонь, дзе адна кватэра  выдзелена  для адсялення з састарэлага і аварыйнага жылля.

60-кватэрны дом будзе ўзведзены на вуліцы Выратавальнікаў у Мар’інай Горцы.  Жыллё, што пабудуюць будаўнікі ААТ «Будаўнічы трэст №35» (Мінск), прызначана для вайскоўцаў, якія маюць патрэбу ў паляпшэнні жыллёвых умоў.  Дарэчы, праект прадугледжвае будаўніцтва лакальнай кацельні, што будзе працаваць на электрычнасці.  Такі дом стане першым у раёне.

Побач з новабудоўляй на вуліцы Малінавая зараз завяршаецца будаўніцтва жылога дома на 60 кватэр для шматдзетных сем’яў.  Як і ў папярэднім доме, у гэтым прадугледжана праектам пакватэрнае ацяпленне.

Усяго ў 2021 годзе ў раёне плануецца  ўвесці  ў  эксплуатацыю 9 тысяч квадратных метраў жылля ў шматкватэрных дамах.

Акрамя  гэтага,  наваселле   да  1 верасня павінны адзначыць будучыя выхаванцы новага дзіцячага садка ў пасёлку Дружны.  Садок разлічаны на 230   месцаў.   Будаўніцтва вядзе  УП БУ-20 «Мінскпрамбуд».  Працы на аб’екце не спыняюцца і ў выхадныя дні.  Будынак ужо пабудаваны.  Але наперадзе яшчэ немалы фронт работ.

У гэтым годзе пачынаецца праца па праектаванні будучага пажарнага дэпо.  Новы сучасны  аб’ект   з’явіцца на вуліцы Выратавальнікаў у Мар’інай Горцы.  Цяпер афармляюцца  дакументы  на  адвод  зямлі.

Тут, на Выратавальнікаў, будзе ў далейшым весціся будаўніцтва новых жылых шматкватэрных дамоў для гараджан.  Менавіта гэтая вуліца стане галоўнай будаўнічай пляцоўкай.

Алена   ШАНТЫКА.