У ПСУ «Рудзенскае» атрымліваюць трыцікале па 50 цэнтнераў з гектара

Уборка ўраджаю-2022 усё больш упэўнена набліжаецца да свайго фінішу. На раніцу пятніцы ў раёне было ўбрана 87 працэнтаў плошчаў. Завяршылі ўборку збожжавых і зернебабовых культур СГФ «Чырвоны май», КСУП «Вецярэвічы».

У раёне 38 экіпажаў намалацілі больш за тысячу тон божжа, і тры вадзіцеля перавезлі ад камбайна больш за дзве тысячы тон збожжа.

У ПСУ «Рудзенскае» патрэбна было ўбраць  1205 гектараў збожжавых і зернебабовых,  800 гектараў з іх ужо ўбралі.  У полі працуюць чатыры свае экіпажы, а таксама экіпаж з суседняй гаспадаркі — СПФ «Дрычын». Да таго, як ён прыйшоў на дапамогу, нагрузка на камбайн была вялікая — 300  гектараў. Свае камбайнеры ўбіралі за дзень да 80 гектараў,  зараз жа работа пайшла хутчэй.

— Ураджайнасць у гаспадарцы сёлета вышэй за леташнюю. Мы атрымліваем 45 цэнтнераў збожжа на круг, — адзначае галоўны аграном ПСУ «Рудзенскае» Ягор Вашкевіч.  — Трыцікале  дае па 50 цэнтнераў збожжа з гектара, ураджайная і азімая пшаніца — 46 цэнтнераў з гектара. Самымі шчодрымі аказаліся азімыя культуры, зіма для якіх была сёлета вельмі спрыяльнай.

Два экіпажы — Аляксандр Юдзін разам з Ігарам Жаркевічам і Анатоль Піскун  з бацькам Мікалаем — ужо пераадолелі тысячную мяжу. У гаспадарцы распрацаваны ўмовы спаборніцтва: тыя, хто на працягу дзесяці дзён намалоцяць збожжа больш, — атрымаюць прэмію.

Аляксандр Юдзін

У гаспадарцы ўсе камбайны айчыннай вытворчасці. У мінулым годзе атрымалі новы. Яго даверылі вопытнаму камбайнеру Аляксандру Юдзіну. І ён давер апраўдаў, працуе вельмі сумленна.

— Я  ўбіраю хлеб ужо 11-ы сезон, — расказвае Аляксандр. — Круглы год працую на энерганасычанай тэхніцы: на нарыхтоўцы кармоў, на ворыве глебы.  А больш за ўсё люблю ўбіраць пшаніцу: збожжа  лёгкае,  бункер — амаль 8 тон — хутка напаўняецца. А вось нізкарослыя культуры,  ячмень і авёс, рана адлягаюць і цяжка рэжуцца, што запавольвае ўборку.

— У гэтым годзе ўскладняе жніво на нашых палях палегліца, — кажа аграном Ягор Вашкевіч. — Таму выкарыстоўваем сцеблапад’ёмнікі, а таксама ходзім загонкамі, каб не страціць збожжа. Дарэчы, магутная тэхніка на жніве практычна не падводзіць. Калі здараюцца нязначныя паломкі,  іх хутка рамантуюць. Запасныя часткі на нашы камбайны ёсць у наяўнасці.

Анатоль Піскун жыве і працуе ў Мінску. Асноўнае месца яго работы — машыніст бульдозера на УП «Мінскметрабуд». На час жніва вось ужо шосты сезон ён адкамандзіраваны ў Рудзенск.

Анатоль Піскун

— Даводзіцца ўставаць у пяць раніцы, каб паспець дабрацца на працу, а ад’язджаю дадому пасля дзесяці вечара, — кажа камбайнер. — Дома чакаюць жонка і двое дзяцей. Меншаму  толькі месяц. Вось такое выпрабаванне на трываласць.

Услед за камбайнамі ў гаспадарцы прасуюць салому. Для жывёлагадоўлі яе неабходна нарыхтаваць 1600 тон. Адначасова вядзецца сяўба азімага рапсу, рыхтуецца глеба пад азімыя збожжавыя. Іх трэба пасеяць на плошчы 900 гектараў.

Анастасія ПЛЯТНЁВА.