Добрая традыцыя — праводзіць штогод Дзень талерантнасці
У Мар’інагорскім вучэбна-педагагічным комплексе дзіцячы сад-сярэдняя школа ёсць добрая традыцыя: праводзіць штогод Дзень талерантнасці. Для навучальнай установы гэта актуальна таму, што тут побач з іншымі навучаюцца дзеці з асаблівасцямі ў развіцці.
Наладжваць зносіны з людьмі, якія па сваім фізічным альбо псіхічным развіцці адрозніваюцца ад стандартаў, не ва ўсіх атрымліваецца. Гэтаму трэба вучыцца. З дзяцінства чалавек павінен разумець, што ўсе людзі маюць аднолькавае права на жыццё. Сэнс мерапрыемстваў, якія праводзяцца ў навучальнай установе, — напомніць аб любові, цярпімасці і ўменні дараваць.
У гэтым годзе дзень, які праходзіў пад знакам талерантнасці, быў напоўнены самымі рознымі падзеямі. Дзеці разам са сваімі педагогамі стварылі птушку дабра. Па-сапраўднаму ўсіх аб’яднала спартландыя. Старшакласнікі пастараліся перадаць ідэі талерантнасці праз флэш-моб. А малодшыя школьнікі адправіліся ў падарожжа ў краіну сяброўства, дэвізам якога сталі словы: “Усе мы розныя, але мы разам, і мы роўныя”.
Наталля ВАСІЛЬЕВА.