Мінулы ўік-энд выдаўся больш чым экстрэмальным
Мінулы ўік-энд выдаўся больш чым экстрэмальным і для грамадзян, і для большасці службаў (дарожных, камунальных, медыцынскіх, энергазабяспечваючых). Снежна-ледзяная абстаноўка, якая склалася з-за дажджу, стала сапраўдным выпрабаваннем.
Лёд пад нагамі, а таксама непрыбраны своечасова снег з дахаў і ледзяшы могуць стаць рэальнай пагрозай для жыцця і здароўя. Не хадзіце зараз блізка да будынкаў, глядзіце, ці не звісаюць з дахаў ледзяшы. Памятайце, што характар пашкоджанняў ад падзення снегу або лёду можа быць розным: ад лёгкага сатрасення галаўнога мозгу да чэрапна-мазгавой траўмы. А ў горадзе ёсць такія ледзяшы, якія выглядаюць зусім не па-дзіцячы. Уласнікам будынкаў трэба не чакаць адлігі, а задумацца над тым, як прадухіліць бяду.
Паводле інфармацыі mlyn.by у Мінскай вобласці для ўборкі дарог у выхадныя было задзейнічана 480 адзінак тэхнікі. Работнікі МНС выязджалі 33 разы на выклікі па буксіроўцы транспарту, распілоўцы дрэў, дэмантажы дэфармаваных будаўнічых канструкцый. Заяўкі паступалі практычна з усіх раёнаў, у тым ліку з Пухавіцкага. І найбольш складаная сітуацыя з адключэннем электрычнасці ў нейкі момант складвалася менавіта ў нас.
— Тэхніка УП «Жылцепласэрвіс» КГ працавала і днём, і ноччу, — расказвае начальнік участка «Добраўпарадкаванне» камунальнага прадпрыемства Юрый Нікіцін. — Толькі ў раёне Мар’інай Горкі было задзейнічана 3 пескараскідвальнікі, 2 пагрузчыкі, 5 трактароў. 24 рабочыя па комплекснай уборцы тэрыторый працавалі ў выхадныя дні на расчыстцы і падсыпцы тратуараў і прыдамавых тэрыторый. Безумоўна, аднамаментна мы не маглі справіцца з сітуацыяй на сто працэнтаў, таму што снег не спыняўся, а потым і зусім пайшоў дождж. Работы па расчыстцы праводзяцца па алгарытме (цэнтральныя вуліцы, пад’езды да сацыяльных аб’ектаў у першую чаргу), таму недзе грамадзянам даводзіцца чакаць. Дыспетчары прымалі да 30 заявак за дзень ад насельніцтва. Мы імкнёмся вырашаць іх максімальна апэратыўна. Але надвор’е працягвае нас выпрабоўваць, таму цяжкасці ў ліквідацыі стыхіі па-ранейшаму ёсць.
І, значыць, нам можна будзе прадоўжыць наракаць на непаваротлівасць тых жа камунальнікаў ці дарожнікаў. А можна замест гэтага паспрабаваць унесці свой асабісты ўклад у агульную справу і паўдзельнічаць ва ўборцы тэрыторыі ад снегу. Можна выйсці і расчысціць снег каля сваёй хаты, каля пад’езда, можна дапамагчы працаўнікам школ, дзіцячых садоў, куды ходзяць вашы дзеці. Важна дапамагчы і пажылым людзям. Прыклады такой неабыякавасці я не раз назірала ў адным кааператыўным жылым доме ў сталіцы: жыхары заўсёды падчас снегападу выходзілі і дапамагалі дворніку чысціць снег, разумеючы, што чалавек — не машына і не можа не стаміцца. Хто не верыць — вазьміце ў рукі рыдлёўку! У нас у горадзе такога альтруізму я не назірала, на жаль, ні разу.
Вяртаючыся да працоўных выхадных, трэба адзначыць працу спецыялістаў раёна электрасетак. У панядзелак на ліквідацыі наступстваў непагадзі працавала 18 брыгад, 18 адзінак тэхнікі і 10 адзінак спецтэхнікі. На некалькіх малочнатаварных фермах былі ўстаноўлены аўтаномныя крыніцы электразабеспячэння. За выхадныя дыспетчар прыняў больш за 1000 заявак ад жыхароў Блонскага, Турынскага, Навапольскага і іншых сельсаветаў.
Аказаліся не гатовымі да перамяшчэння ў экстрэмальных умовах і ўсе мы. Лёд, аказваецца, нават калі ён месцамі пасыпаны, усё роўна слізкі. Падзенняў у такія дні пазбегнуць складана. Добра, калі ўсё добра заканчваецца. Але бывае і наадварот. Восем разоў за выхадныя дні «наадварот» усё ж такі здарылася, і людзям спатрэбілася дапамога медыкаў. І яны просяць усіх нас быць максімальна асцярожнымі пры перамя-шчэнні ў такое надвор’е.
Па дадзеных Рэспубліканскага гідраметэацэнтра, першую палову тыдня снег будзе ісці. У другой палове тыдня, паводле прагнозу, усталюецца больш стабільнае надвор’е. Да пятніцы — суботы чакаюць пахаладання ў стылі «мароз і сонца» — аж да -18 градусаў.
Алена ІВАНОВА.
