80-ая годовщина освобождения Беларуси Главное Настаўнік, падпольшчыца, герой… Тры ролі на жыццёвым шляху Любы Гайдучонак 27.05.2024 187 Redactor Комментариев нет Чым далей адыходзяць ад нас падзеі Вялікай Айчыннай вайны, тым важней памятаць тых, хто цаной уласнага жыцця каваў перамогу на фронце і ў тыле. Але імёны нашых герояў-землякоў захаваны не толькі ў народнай памяці: імі названы вуліцы і завулкі, у гонар іх узведзены помнікі і мемарыялы… Адзін з такіх помнікаў знаходзіцца ў парку горада Мар’іна Горка. Ён быў устаноўлены камсамольцамі раёна ў 1972 годзе ў гонар падпольшчыцы Любы Гайдучонак. Яе гісторыя з’яўляецца яскравым прыкладам таго, што жанчыны, ваяваўшыя нароўні з мужчынамі, шмат зрабілі для перамогі над ворагам. Дзяўчына была не толькі членам, але і арганізатарам партызанскага руху на тэрыторыі Мінскай вобласці. Любоў Гайдучонак нарадзілася ў вёсцы Берлеж Пухавіцкага раёна. Як і ўсе маладыя людзі, пасталеўшы, пачала будаваць планы на жыццё, марыла стаць настаўніцай. Скончыўшы Мінскі педінстытут імя Максіма Горкага, яна ўладкавалася школьным настаўнікам у Рызе. Магчыма, жыццё і далей цякло б даволі размерана, але ўсё перакрэсліла вайна. Любе было ўсяго 20 гадоў. Маладая камсамолка эвакуіравалася на ўсход. Але адседжвацца, пакуль на франтах ідуць жорсткія баі за Радзіму, было не ў яе характары. Люба вырашыла паехаць у ЦК Камсамола Беларусі, дзе прасілася на Міншчыну на падпольную працу. Пасля гэтага яна прайшла пад-рыхтоўку камсамольскіх работнікаў. У 1942 годзе дзяўчыну ўсё ж накіравалі ў тыл ворага. Там яна стала прадстаўніком ЦК ЛКСМБ па Мінскай вобласці, членам Мінскага падпольнага міжрайкама, сакратаром Мінскага падпольнага райкама ЛКСМБ. Люба не губляла часу і разгарнула актыўную барацьбу супраць фашыстаў. З яе ўдзелам праводзіліся дыверсіі, знішчаліся стратэгічныя аб’екты і варожыя склады, распаўсюджваліся антыфашысцкія ўлёткі, партызанам перадавалася зброя. Любоў Гайдучонак стварала ў вёсках новыя падпольныя камсамольскія групы, са-дзейнічала з’яўленню ў горадзе Мар’іна Горка Пухавіцкага падпольнага райкама ЛКСМБ. Яе добра ведалі байцы партызанскіх атрадаў у Чэрвеньскім, Пухавіцкім, Мінскім раёнах. Калі ў 1942 годзе падполле раскрылі, Любові Георгіеўне ўдалося ўстанавіць сувязь з уцалелымі камсамольскімі атрадамі і аднавіць іх дзейнасць. Смерць напаткала Любоў Гайдучонак у няроўным баі. Як гэта адбылося, згадваецца ў кнізе «Памяць. Пухавіцкі раён»: «23 мая 1943 года з групай таварышаў Люба вярталася з чарговага задання. Каля вёсцы Клебанцы, што ў Мінскім раёне, партызаны трапілі ў варожую засаду. Завязаўся бой. Сілы былі няроўныя. Дзяўчыну раніла ў абедзве нагі. Ісці яна не магла. Тут жа вырашыла прыкрыць адыход партызан. Трапнымі стрэламі з пісталета стрымлівала яна гітлераўцаў. Каб не трапіць у рукі катаў жывой, Люба пакінула апошні патрон для сябе…» У кнізе «Памяць. Пухавіцкі раён» мне ўдалося знайсці крыху інфармацыі пра членаў сям’і Любові Гайдучонак — брата Яўгена і маці Паўліну, чые жыцці таксама абарвала гэтая кровапралітная вайна. Яўген загінуў у партызанах у 1943 годзе, а Паўліну зажыва спалілі фашысты ў вёсцы Арэхаўка Чэрвеньскага раёна ў маі 1944 года. Многа гадоў Любові Гайдучонак ужо няма з намі, але памяць пра яе жыве і будзе жыць на пухавіцкай зямлі вечна. Імем падпольшчыцы ў горадзе Мар’іна Горка названы парк, дзе ёй устаноўлены помнік, а ў сярэдняй школе №1 — піянерская дружына. Любоў Георгіеўна пасмяротна была ўзнагароджана ордэнам Айчыннай вайны першай ступені. Алеся СМІРНОВА.